普選落閘、佔中在即，小港陰霾密布。林超英看慣風起雲湧，比較淡然，因他知道什麼是變數，「群眾運動的對錯，要一百年後至知」；但眼前有人擘大眼講大話，他不能不追擊到底。說的是力推機場第三條跑道的機管局高層。毀掉此城的何止是假普選？還有足以搾乾香港財政的千億基建。「香港的地產商叫自己做發展商，搞到個個以為『發展』就係起嘢。」這次他不講環保，啷啷上口盡是數字、投資與成本效益，「香港人市儈，鍾意講錢嘛，我就同你計錢。」大爆機管局篤數，將機場「轉型」，服務轉機客和內地三四線城鎮，做盡無肉食的生意，製造跑道飽和假象。
「點解唔係善用現有資源去搵錢？」林超英清楚機場的前世今生，因為一九七九年政府研究新機場選址，時為天文台科學主任的他就主理赤鱲角島的氣象觀測；這裡每班飛機升降，靠的也是天文台的風向風速資料。三十多年裡，他看着荒山野嶺變成國際航空樞紐，再由世界最佳機場淪落到三甲不入。
「好似乞兒咁，希望人哋行過就買多少嘢，跟住執番多少，這是極低端的經濟活動。」東方之珠的一切在褪色，他引用佛家語：「成住壞空，天都在看着。」
載林超英入機場取景拍照，車子剛過青馬大橋，他便開始如數家珍——「對岸個白色波是我們的雷達」，「這邊山的屋仔是氣象站」，「前面海中間個浮標呢，你睇唔睇到？度風速的，有好幾個。」像說起自己親生仔般自豪。赤鱲角背靠大嶼山一整列山脈，鳳凰山、大東山、二東山，高低起伏，還有東北方的青山和大欖，極易形成風切變和漩渦形亂流，有機師形容為世上最難升降的機場之一。但十級怪風，催生一流技術。新機場初開時，全球只美國有量度風切變的雷達系統，香港花了一億購買。不過，人家的風切變因雷雨形成，所以那雷達是測量水氣移動的；香港的風切變卻是地勢因素，即使大晴天也有，天文台就想到利用激光雷達，量度空氣中移動的塵粒，然後自行研發計算方式，能測到百分之九十五的風切變，「叻過美國，我哋係世界第一o架！」
荒山變玫瑰園
世界第一，源自一個鳥不生蛋的小島。七十年代末，港府覺啟德機場繁忙，開始構思在赤鱲角建新機場，但先要知道氣象條件是否符合。「這新工作無咩人願意做，『去研究嗰度嘅氣象情況』，就得呢幾隻字，都無人知點做。」那時做五、六年可晉升高級科學主任，林超英入職第四年，「最難啃的梗係俾就快升職嘅人啦。」帶四、五個年輕伙記組隊，就去。在赤鱲角島上改裝一間木屋做基地，一邊是辦公室、一邊是宿舍。林超英不留宿，有個廁所改裝而成的「辦公房」，僅夠放一張桌子。山頭沒路，伙記們直升機出入，每一兩個星期輪流回家，食水都是用躉船運來的。
那時還未有量度風切變的儀器，他們帶着地震儀上小型飛機，飛入亂流中量度震盪幅度，「啲飛機師就慣啦，我地就慘喇！」暈機浪暈到天旋地轉。為找地方放儀器，附近一帶山頭，林超英行了不知多少遍，可惜赤鱲角長不出大樹，無鳥可觀。留宿的小伙子倒是日日有「私家泳灘」游水，釣魚摸蜆吃海鮮。那年頭的大嶼北海面，還是波光粼粼，常見白海豚身影。
研究踏入第四年卻被腰斬。一九八三年，中英就香港前途談判，山雨欲來。九月，超強颱風「愛倫」襲港，十號風球把木屋打爛了一半，三個伙記與天文台的聯絡中斷十幾小時，「好擔心，好在無事！」十五日後，港元匯價跌到九點六兌一美金的歷史低位，開始有人搶購糧食。經濟差，機場也不起了。重提計劃是因為另一場信心危機，八九六四，全港死氣沉沉，「那時大家真係咩都無癮的。天文台以前放工和食飯時間好多人打乒乓波的，好墟冚，六四之後，年幾兩年都無人打，好無癮。」但這次政府有錢，「就整個玫瑰園計劃囉，起嘢，振奮人心。」林超英又再披甲上陣。「嗰時我係支持政府起的，啟德真係唔掂吖嘛，而且交換到好多人的安樂窩嘛。我都住過飛機肚下面，有段時間住又一村，真係好嘈o架。」
由七九年開始覺啟德飽和，到新機場啟用，相隔近二十年；中間就靠民航處想辦法增大容量、提高效率，「轉用大飛機啦，後期大部分都係747了；同埋客運大樓以前好細o架，整整吓大啲，整整吓又大啲。」結果單跑道一年也能處理三千萬客，「梗係超負荷啦，啟德最初係飛水機o架咋！」那種浮在海面升降的小型飛機，六十年代絕種。「啟德機場仲係公務員管添，唔係嗰啲好有彈性、好鬼高薪嘅咩行政總裁去搞個機管局整o架喎。」
力證機場未飽和
民航處管得好哋哋，為何成立機管局？「就同英國離開香港有關，佢要做弱將來的特區政府，這是其一。」其二是八十年代起跟隨戴卓爾夫人的「小政府、大市場」思維，九廣鐵路、醫管局、機管局等「事業單位」陸續獨立出去。「本來想九六年六月三十日之前開，等港督可以從新機場走的，但機管局初初搵個鬼佬做總裁，懶懶閒咁愈搞愈遲，結果用好多錢炒咗佢，換番個公務員入去，捉到實，先至九八年開到之嘛。」飛鳥盡，良弓藏，機場漸上軌道後，又換上商界人士掌舵，「唔熟書囉。」為免露底，凡有關三跑只推AO出身的機管局企業發展執行總監馮永業出來應對，「佢醒嘅，不過佢只係做咗四年，我話機場的故事要從三十幾年前講起，人哋舊時起赤鱲角，係預緊二○四○年嘅嘢，佢哋機管局反而只係睇到二○三○年。」赤鱲角機場的設計，本容許每小時最高八十六班機升降，但開業之初未有此需要，至今升降量也只去到六十八班、客運量只達設計容量的七成、貨運更不到一半。要用盡現有跑道，規劃機場時已列明，二○○五至一五年有幾項跟進工程，包括把大嶼山東北角的山頭削矮二十米，讓飛機可循此處轉彎向南，更快離開升降航道，縮短下一班機的等候時間；還有二號客運大樓，本不是指現在那個「拍烏蠅」的商場，而是建議在機場島中間、現有Y形客運樓旁邊多建一幢X形的，可提供飛機泊位四十四個，讓現有泊位大增五成，「鐵路一早鋪咗過去，但大樓現在仍影都無。」民航處也開發了應用GPS技術的新航道，但機管局沒對外宣傳，只有很少飛機採用。「本來做好這些事，已可增加到八十二至八十六架次，而家咩都無做過，你同我講飽和？」
時光倒流穿膠花
以上種種，應是前總裁許漢忠任內要做的事，「佢有一次撩我食晏嘅，都年幾兩年前了，不過結果佢就遲大到啦，跟住就教育我，『香港經濟最緊要』之類，其實就係來教訓我。」林超英沉默半晌，「我好少咁樣講人，不過佢係傲慢嘅，覺得佢想做嘅嘢實會做到咁。」許與其前任CEO彭定中，為香港經濟所做的就是推出「新航點優惠安排」，航空公司開新航點可享着陸費折扣，令近年飛往內地三四線城鎮的航班大增，「咁嗰啲飛機梗係少人搭啦，又係細機，但一樣佔用跑道喎。」變相令每個跑道時段所能帶來的收益減少。「起第三條跑道，佢哋自己計的數，將來百分之四十幾，係過境或者轉機的人，唔係服務香港人、或者出入香港嘅人o架。只係賺佢哋停留機場時買吓嘢的錢，機管局就賺吓賣嘢的鋪頭的鋪租，呢啲係好低端的經濟活動，仲諗緊穿多幾朵膠花就搵多幾毫子？五、六十年代的思維嚟o架，簡直倒退！」他再三強調，第三跑道是一項不可逆轉的大工程，「你好難想像填完海之後會挖番個海出來吧？」不可逆轉，就要想清楚是否別無選擇，「削山、起X形大樓，一定平過填海起跑道。點解平的方法你唔用？咁少的利益，要換一個永遠的損失？」機管局早前放風，三跑的工程費可能達二千億甚至更高，林超英估計他們一定會想辦法繞過立法會，「或者去國際融資，但找政府做擔保，結果還唔起，筆債都係我哋香港人揹。」「三分一俾晒啲設計費、監管費，三分一買材料，剩下那三分一才是建造費。建造商都唔一定係香港公司喎，又中國海外呀、中國港灣呀，一陣話唔夠人手，仲嚟一班外勞添，結果香港人袋得落袋嘅係好小部分。」
愛烏及屋
力陳理據，但今日香港已不再是個講道理的地方。「唔知o架，當初搞塱原都唔覺得會贏。」林超英關心環境與發展，是由觀鳥開始，「人哋愛屋及烏，我就愛烏及屋。」七六年他遇上啟蒙老師，愛上觀鳥，「余生也晚，都睇過新界啲雀成片成片咁飛。」漸漸他觀鳥的去處逐一淪陷，「屏山廈村、錦田……而家？成片成片的貨櫃同建築廢料。」九九年，殺到塱原。九鐵落馬洲支線想建一條高架橋跨過這雀鳥天堂，林超英忍夠。「塱原個名都係我起的，本來無名，咁要出來反對，無理由次次都話河上鄉、燕崗同松柏塱中間那塊平原嘛。」外國觀鳥者習慣叫那裡Long Valley，他音譯為塱原，後來政府地圖都沿用。那時他是觀鳥會主席，但仍任職天文台，不便出面，就在觀鳥會裡做「幕後黑手」，「號召一人一電郵擲去特首辦，擲到佢哋癱瘓，因為第一次有人咁搞。」又聯繫國際鳥盟的專家，把塱原劃入該會認可的「重要鳥類地區」，弄得陳方安生外訪都被人問到Long Valley的情況。「但還是靠天時地利人和。」法例寫明，環評報告接納與否，最終由環保署長一個人決定，「那是環保署最後一個鬼佬署長，就退休喇，做番件事囉。佢話考慮晒所有意見後，根據我嘅專業判斷，呢個EIA報告唔合格。」一錘定音。落馬洲支線改為鑽隧道、走地底。「從來無人諗過，會有咁大嘅項目，死喺環評報告上。當時我搞？盡吓責o架咋，發夢都無諗過得o架。」反三跑，他抱着同樣心態，「我知道嘅嘢咪講晒佢，但如果個社會聽完之後無反應，無人支持我，咁就係香港人嘅共業了。」他兩個兒子都過而立之年，做攝影師的大仔在美國樂不思蜀，細仔從事古典音樂創作，最近回港發展。此城變壞，不擔心下一代將來？「係佢哋嘅緣分囉，應該佢哋去嘈o架嘛，無理由我去嘈。」年輕時也搞過學生運動的他，認老了，精力不如前，「我就覺得後生仔係應該搞嘢嘅，如果唔係，個世界好悶喎。」
沒有留言:
發佈留言